МЭДЭЭ, МЭДЭЭЛЭЛ, Арга хэмжээ
Lexus Mongolia-ийн мэдээний ангилал
Энэ мэдээг бусдад хуваалцаарай!
Итали улсын Милан хот, 2026 оны 4-р сарын 21–26 — Дэлхийн дизайны хамгийн нэр хүндтэй арга хэмжээнүүдийн нэг болох Milan Design Week энэ жил автомашины брэндүүдийн хувьд бүтээлч өрсөлдөөний тайз болов. Range Rover, Audi, Mini, Hyundai, Geely зэрэг брэндүүд Миланы гудамж, галерей, түүхэн барилгуудад өөрсдийн үзэсгэлэн, инсталляцыг дэлгэсэн бол Lexus брэнд бүтээгдэхүүнээс илүүтэй ирээдүйн тухай философио танилцуулснаараа онцгой ялгарав.
2005 оноос хойш Milan Design Week-д тогтмол оролцож ирсэн Lexus брэнд энэ жил Тортона дүүргийн Superstudio Più цогцолборт нийт таван концепц бүтээлийг танилцуулсан бөгөөд тэдгээрийн төвд “SPACE” буюу “Орон зай” үзэсгэлэн байрлав. Энэхүү үзэсгэлэн нь зөвхөн автомашин харуулах талбар бус, харин Lexus брэнд хөдөлгөөний ирээдүйг хэрхэн төсөөлж буйг илэрхийлсэн философийн мэдэгдэл байлаа.
Үзэсгэлэнгийн гол хэсэгт 2025 оны Japan Mobility Show-д анх танилцуулагдсан зургаан дугуйт LEXUS LS Concept автомашин байрласан бөгөөд уг концепт автомашиныг цилиндр хэлбэрийн LED дэлгэцээр хүрээлж, 360 градусын дүрслэл, гэрэл, дуу авианы хослол бүхий орчин бүрдүүлжээ. Үзэгчид зөвхөн автомашин үзэх бус, ирээдүйн хөдөлгөөнт орон зайд өөрсдийгөө мэдрэх боломжтой байсан юм.
Үзэсгэлэнгийн үеэр Lexus International-ийн Брэнд хариуцсан захирал Саймон Хамфриз нэгэн онцлох мэдэгдэл хийсэн нь олон нийтийн анхаарлыг татав. Тэрээр “LS загварын ‘S’ үсэг цаашид ‘Sedan’ гэсэн утгыг илэрхийлэхгүй, харин ‘Space’ буюу орон зай гэсэн шинэ утгыг агуулна” хэмээн зарласан юм.
Энэ нь зүгээр нэг нэршлийн өөрчлөлт биш байлаа. Харин автомашиныг зөвхөн зорчих хэрэгсэл гэж үздэг уламжлалт ойлголтоос татгалзаж, хүний амьдралын нэг хэсэг болох орон зай, туршлага, харилцааны шинэ хэлбэр рүү шилжиж буйг илэрхийлсэн брэндийн шинэ стратегийн чиглэл байв.
Lexus брэндийн дэвшүүлж буй үзэл баримтлалын гол санаа нь газар, далай, агаарын хөдөлгөөнүүд хоорондоо нэгдэн, хүмүүс зөвхөн нэг цэгээс нөгөөд хүрэх бус, тухайн орон зайд амьдарч, бүтээж, харилцах шинэ боломжуудыг бий болгоно гэж үзжээ.
Үндсэн үзэсгэлэнгийн зэрэгцээ Lexus 2025 онд эхлүүлсэн “Discover Together” хамтын ажиллагааны төслөө өргөжүүлэн, “Discover Your Space” сэдвийн хүрээнд дэлхийн дөрвөн бүтээлч багтай хамтран ажиллажээ. Японы дизайнерууд Хаяши Кётаро, Куротани Юми, Италийн Guardini Ciuffreda Studio, Нидерландын Random Studio болон Lexus брэндийн дотоод дизайнерууд тус бүр LS Concept-ийн арын суудлын орон зайг өөрийн өнцгөөс дахин тайлбарласан бүтээлүүдийг толилуулсан байна.
Эдгээр бүтээлүүд нь гэрэл, дуу чимээ, материалын сонголт болон хүний оролцоонд суурилсан интерактив шийдлүүдээр дамжуулан ирээдүйн хөдөлгөөнт орон зай ямар байж болохыг харуулахыг зорьжээ.
VISIBLE INVISIBLE
Kyotaro Hayashi & Yumi Kurotani (Japan)
Японы цайны өрөөний философиос сэдэвлэсэн энэхүү бүтээл нь гэрэл, орон зай, цаг хугацааны үл үзэгдэх хөдөлгөөнөөр дамжуулан хүмүүсийн сэтгэл хөдлөлийн холбоог илэрхийлнэ. Харагдахгүй зүйлс амьдралын үнэ цэнийг бүтээдэг гэсэн санааг тусгажээ.
WEARABLE SPACE
Guardini Ciuffreda Studio (Italy)
Хүний бие орон зайд оршдог төдийгүй өөрөө орон зайг бүтээдэг гэсэн үзэл санаанд тулгуурласан бүтээл. Гэрэл цацруулдаг хувцсаар дамжуулан бие, орчин, технологийн харилцааг шинээр тайлбарлажээ.
A MOVING SANCTUARY
Random Studio (Netherlands)
Автомашиныг хөдөлгөөнт бясалгалын орон зай болгон төсөөлсөн бүтээл. Амьсгалын хэмнэлд хариу үйлдэл үзүүлэх гэрэл, дуу авианы орчин нь тайван төвлөрлийг бий болгож, автомашины бүхээгийг сэтгэл амрах орон зай болгон хувиргана.
THE CRAFTED COSMOS
Japanese Craftsmen & Lexus In-House Designers
Японы гар урлалын нарийн ур чадвар болон гэрлийн урлагийг хослуулсан бүтээл. Хүний гараар бүтсэн өчүүхэн деталь сансар огторгуйн хязгааргүй уудамтай холбогдож, япон урлалын үнэ цэнийг шинэ түвшинд харуулжээ.
Lexus брэндийн эргэн тойронд бусад автомашины брэндүүд ч өөр өөрийн өнгө төрхийг харуулсан байна. Audi компани Zaha Hadid Architects студитэй хамтран “The Origin” нэртэй инсталляцыг танилцуулж, технологи ба сэтгэл хөдлөлийн холбоог илэрхийлэв. Range Rover “Traces” үзэсгэлэнгээрээ гар урлал, хувийн захиалгат бүтээлийн үнэ цэнийг онцолсон бол Mini дизайнер Пол Смиттэй хамтран өнгө ба мэдрэмжийн ертөнцийг бүтээжээ. Hyundai дизайны үйл явцыг харуулсан “From Paper to Steel” үзэсгэлэнгээрээ оролцсон бол Geely Milan Design Week-д анхны дебютээ хийж, үзэгчдийн хөдөлгөөнд хариу үйлдэл үзүүлдэг интерактив инсталляцыг толилуулсан байна.
Бусад брэндүүд бүтээгдэхүүнээ соёл, урлагийн хүрээнд танилцуулсан бол Lexus брэнд илүү том алхам хийж, нэг автомашин бус таван өөр инсталляц, нэг дизайнер бус дөрвөн улсын бүтээлч баг, нэг бүтээгдэхүүн бус хөдөлгөөний ирээдүйн тухай шинэ философийг танилцуулсан нь тус брэндийн энэ жилийн оролцоог онцгой болгосон юм.
Өнгөрсөн жил Lexus брэнд хүн ба автомашины харилцааг илэрхийлсэн “A-Un” инсталляцаа толилуулж байсан бол энэ жил “Space” концептоороо газар, далай, агаарын хөдөлгөөнийг нэгтгэсэн шинэ экосистемийн тухай төсөөллийг дэвшүүлж, хөдөлгөөний хэрэгслийн ирээдүйн утга учир, хүний амьдрал дахь орон зайн шинэ үнэ цэнийг дахин тодорхойлохыг зорьжээ.
Дараагийн мэдээ
Та хамгийн сүүлийн мэдээг үзэж байна.